Юлдузларга ноодатийлик ёқса, журналистларга антиқа, кутилмаган ва ҳеч қачон мурожаат қилинмаган саволлар билан мурожаат қилиш жуда хуш ёқади. Одатда, руҳий саволлар орқали инсон қалбини ойна каби кўриш мумкин. Келинг, бирга Нилуфар Усмонованинг қалбига боқамиз. 

 -Болалигингизда нимадан қўрқардингиз?

-Ёлғиз қолишдан.

-Хорижий тилда айтган биринчи иборангиз?

-Apple ва plate.  

-Сиз учун энг катта гуноҳ?

-Бировнинг дилини оғритиш.

-Сиз ҳеч қачон унутмайдиган жанжал?

-Билмадим. Унутиб юбораман. Гиначи эмасман.

-Ота-онангиз кўпроқ қайси жиҳатингиздан койирди?

-Эҳҳҳҳ. Ўқишга қизиқмаслигимдан.

-Шуҳрат сизни қай даражада ўзгартирди?

-Ҳаётга реал қарайдиган бўлдим. Реалистман ҳозир.

-Ўлимдан кейин ҳаёт борми?

-Бор. Қолганини эса бу дунёда билмаймиз.

-Севган инсонингиз ҳақида савол беришса, одатда нима деб жавоб берасиз?

-Севганим бор дейман. Севсанг, баралла изҳор қил деган шиорим бор.

-Ўзингизни чиройли деб ҳисоблайсизми?

-Жудаям!

-Тасаввур қилинг, ҳаёт тугашига уч кун қолди. Нима қиласиз?

-Менимча, тавба қиламан.

-Яхши харид қилиш учун энг асосий қоида?

-Ёнингизда пулингиз бўлсин.

-Севиб қолсангиз, руҳиятингизда нима содир бўлади?

-Ўзимни қўярга жой тополмайман. Ҳаммага айтиб чиқаман.

-Сизни қандай қилиб ҳайратда қолдириш мумкин?

-Ҳар қанақа вазиятда ҳам эътибор билан.

-Қайси саволга жавоб бера олмайсиз?

-Билмадим. Шу саволга жавоб беролмасам керак.

-Сиз ҳақингиздаги нимани сиздан бошқа ҳеч ким билмайди?

-Характеримни кўпчилик билмайди. Кимлардир виқорли, кимлардир оддий деб билади мени. Аслида меҳрибонман. Бироқ, жаҳлим чиқса, у инсонни унутишга ҳаракат қиламан.

-НУЖга ишонасизми?

-Ишонаман. Кўрганман ҳатто.

-Севиш яхшими ё севилиш?

-Севиш яхши, севилиш ундан кўра яхшироқ.

-Турмуш ўртоғингиз билан ажрашишингизга энг катта сабаб?

-Ёш оила қурганмиз.

-Онангиз одатда нима деб эркалайди?

-“Кукуш”

-Бегона одамлар билан учрашувда биринчи  нимага эътибор қаратасиз?

-Ўзини тутишига, гап-сўзига.

-Сўнгги пайт кимдан шубҳалангансиз?

-Шубха иймон ўғриси дейишади… Таваккал қиламан. Лекин шубҳаланганларим кўп.

-Иккинчи турмушда нималарга эътибор қаратган бўлардингиз?

-Агар севиб қолсам ҳеч нарсага эътибор бермайман.

-Ота-онангизни бирга энг сўнгги марта  қачон кўргансиз?

-Тўйимдан олдин.